[Zomi te omna biala Palai diing telna ate kia huamsak deuh ahi]
Election hun hi nawnta. Vote khiak ni tung dekdek di hita. Buannawi a kiden kidemna hun ahi a. Aniin thei pen dia tok niina kidenna hun bang; nawi theitawp dia bawl a kiden tuahna hun bang. Niin sak dimdem dia kidenna hun bang. Ahi. Himahleh, adeng tam zouzou vualzou chidan a apai hun bang pai kheng ta i bang ua. Ngaihtuahna nei chiat, leh, mikhat LAL na dia kipei ek akaannatna omlou chih bang leng apai peel lam ihi sim nawnta zozen uhi. Nidanglai vai kichi pian ta!
Kuama'n lah candidate te manifesto buaipih a nei nawn sese lou. A pilna, siamna, theihna, chihte gen phak a om nawn taktak lou. MLA ana hi sate' nasep hoihlouh dan (nasep louh dan) gen zek mahle, huaisaanga, a nungzui-te huatdan thu. Vualzawlna avukte eng ziaka, tua vualzawlna kiletpih lua uh isakdante uh gen pen in kinei. Member of Legislative Assembly a member diing telna neih hina zeenpi a, legislation lam buaipih pha lah ki om ta mawngmawng lou. Solkar a i palai diing uh telna, chihtan lel thei. Aban omlou. Candidate te' chitna tehna bang leng acheithei, apau thei, anei zou chih lam hi zaw ta daih mai.
Ahi'a lah, achitna uh leh siamna lam uh en di hita mawngmawng lele i hihna - i nam/i zat a pawlpi' kaankhawm a ki om in, huai a heutute' chih nana a paikhawm dialdial dan in ki om hi. Huai laka angmasialna leh duh-amna hong kigolh khak chiangin hikhial kisuak zeel. Khovel Mipi' Vaihawmna (democracy) gam lian pen pawl a kigen GAM ah kiteng kha a, mahleh mimal deihtelna leh right (fundamental rights & etc) zat theih taktak louh zel. Vaihawmna innpi a 'AW' i suah theihna omsun uh, kuamah hon guk sak theihlouh, Dan banga piching a sim ihihleh, Vote khat kia leu i neihsun bang leng deihdan taka zat theihlouhna mun - Democracy - gam ah kiteeng kha hi.
Tuabanga nam/zat leh pawlpi in gup (support) i puan zeel pen uh hoih sa tadih lai ihi peuhmah di ua, sawt pek akipan ina paipih dan uh ahi ta. A system dan himhim a ikoih uh bang leng ahita hi. Himahleh, i gupte ahon ching louh chiang un tua nam/pawlpi in Sorkal a palai neilou kisuak maimah zeel hi. Banah, hun bangtan hiam paita akipat in pawlpi/nam in a gup louhlouh uh ching zaw maimah abang ta hi. Aching a om chiang bang in le Dan bangtak ahihlouh chiang deuh ahih ziak ahi gige hi. Hiai bangziak ahi dia leh? Heutu bang le mahni punna di en lo zozen houh ihi di uam, chih tamtakte ngaihdan ahi mawk hi.
Zaleen taka Manipur election, 2012 a mipi vote khiak theih diing kichi toh kisai a Election Commission thusuak khauhtak pen zuih ahih a; Singtang gam a helpawl te toh Sorkal in SoO thukhun abawl uh bohsiat louh ahih a; CCTV footage bang lak ahih taktak a; gamnuai mite gamtang lou dia koih ahih taktak leh; pawlpi/nam gupte (support-te) ching zou kei le uh kilawm abang sim ta hi. Hiai i SoO suai uh 'AW' suah theihna hun lemtang a lak maimah bang leng thil baihlampi hong suak thei leh kilawm hi.
Pawlpi leh heutu thuneihna (power) tawi tuamtuamte buk (hausa) deuhdeuh chih nautang lungtang ah lian lota mawk hi. Thuchian thei hetloupi leh chetna diing neilou napi a amaute hihbuktu (hausa saktu) Mipi' Palaite (directly or indirectly) chih ngaihdan nei chiat siam ta kihi lim hi. Himahleh, gense ngam lou, phunphun leh neknek thuah hinkhua mipi'n chiimtaak mahmah ta un, atheihtheih hi. Election chianga support kipuandan a strategy lah mualtung a kho om selguk theihlouh, chih toh kibang ta. Huaiziak in, tanchinbute a election strict didan kigente zuih ahihtakpi di leh, siangthoutaka vote kikhe diing abang hi. Hitaleh, support puan in omzia neilou maimah diing abang hi.
Tuadan a vote siangthoutak a khiat ahi a (mahni vote khiat chiat ahi a); vote khat kia leuh i neih uh i "aw" uh suah ahihtheih a; mipi tamzaw deihte mah ahong ching uhleh bel, ahoih lam a kikhekna dia nauvei kipatna chikhat ahi diam maw? Khanlohna chikhat omta ahi mai diam maw? Innlam a om bangzah hiamte' ngaihdan ka dotkolhna akipan ka khonkhawm te apan suangtuahna ka hon bawl ahi hi. Observations/speculations ahihkeh suangtuahna chuh ahi peuhmah a, adik di leh diklouh di zaw thei sau khang!
Ahi'a, kuate hiam vaihawmna chimtaka, uk-e-kak-e chi ngamlou a, hoihsak leh hoihsak gen di tungtanga kuate hiam chiamteh chiltel diing ilauh leh bel, i kisel theihna omsun mahni vote tek va khiat ahi mai hi. Kivaipuakdan mumallou tak omsaktu hi'a itheihte kianga kum 5 sung sinlai piakna utna lungtang i neihleh leng i zat theihna hun hong hi kha thei hi. Bangteng hileh, aching penpen in i gam ahon phuah ua, genthei liangvai te kankuahtu ahong hi uh, ideih pen ahi hi.
Tutung Manipur Election a ki candidate tengteng a hong ching diing uh deihsakna saang pen ka khak. Himahleh, avek ua ching chih om theilou diing ahih man in, a ching penpen in gam-le-nam naktak a hong puah a, kivaihawmna mumaltak ahon tungding uh ka ngen hi.
No comments:
Post a Comment